Galdandi:

Saman við støðisnámsætlanini galdandi frá 1. august 2023.

Lærugreinin sniðgeving fevnir bæði um materiellar og immateriellar framleiðslur við støði í nýmennandi og grundandi framleiðslugongdum. Nýmennandi, tøknisøguligir, hugmyndasøguligir og samfelagir tættir viðvirka til at styrkja albúgvandi og lestrarfyrireikandi endamálið við lærugreinini. Lærugreinin er grundað á verkætlanir við bæði verkligum og ástøðiligum táttum. Við verkliga partinum fáa næmingarnir innlit í og royndir við veruleikakendum framleiðslugongdum, sum eru sambæriligar við gerandisdagin hjá sniðgevum. Við greining verða verkligu og ástøðiligu partarnir av lærugreinini knýttir saman. Við at greina ymsar liðir í framleiðslugongdini økist fatanin av sniðgeving bæði sum gongd og úrslit, eins og greining av ítøkiligum framleiðslum økir um tilvitan um framleiðslugongdina.

Undirvísingin í sniðgeving hevur til endamáls, at næmingarnir:

• ogna sær vitan og førleikar um sniðgeving, soleiðis at tey kunnu greina og meta um sniðgivna umheimin við at brúka hugtøk og háttaløg úr lærugreinini.
• læra at arbeiða við fakligum háttaløgum við skipaðum arbeiðsgongdum, sum eisini kunnu vera við til at loysa uppgávur í øðrum lærugreinum og hægri útbúgvingum.
• arbeiða við sniðgeving og byggilist úr ymsum mentanum og harvið ogna sær heimsfevnda tilvitan.
• Fáa innlit í týdningin, sum mentanarligar fortreytir hava fyri ymisleikar í sniðgeving og byggilist, harímillum eisini hvussu ítøkiligar tilfarsligar treytir kunnu mynda lokala sniðgeving og byggilist.

Lærugreinin sniðgeving á B-stigi hevur fimm ymisk kjarnaøki. Økini umskarast og virka fyri ein stóran part saman í undirvísingini.

• Sniðgávugreinar
• Sniðgávusøga
• Visualisering
• Undankanningar til ítøkiligar verkætlanir
• Parametur í sniðgeving

Sniðgávugreinar

• framleiðslusniðgeving
• samskiftissniðgeving
• sniðgeving av fysiskum karmum.

Sniðgávusøga

• útvaldir søguligir tættir um sniðgeving frá ídnaðarkollveltingini til í dag, samanborið við ítøkiligar verkætlanir
• tættir í framleiðslugongdini á grundandi stigi.

Visualisering

• skitsur av ymsu stigunum í eini framleiðslugongd
• minst eitt av hesum: tekningar, kollajsur, fotomyndir, 3d-teldumodellering
• rúmlig modell, t.d. prototypur og mock-ups
• mátfastar tekningar og/ella modell.

Undankanningar til ítøkiligar verkætlanir

• kanningar við støði í eygleiðingum og samanberingum
• kanningar við royndum og skitsum
• keldukritisk leiting eftir upplýsingum
• ymisk sniðgávuetnografisk háttaløg til at kanna interessentar, harímillum brúkaran og umbiðjaran
• framløgur av sniðgevingum, harímillum pappírstekningar og talgildar tekniskar tekningar.

Parametur í sniðgeving

Skap, funktión, samskifti, fagurfrøði og tøkni eru yvirskipaðu parametrini í lærugreinini. Tey skulu setast í samanhang við hesi parametur, sum skulu vera á lýsandi stigi: rúm, fagurfrøði, tilfar, bygnaður, mentan, samfelag, klima, burðardygd, framleiðsla, búskapur, søga og etikkur.

Málið við undirvísingini er, at næmingurin dugir:

• at greina og kritisk kjakast um sniðgeving og byggilist, bæði sum arbeiðsgongd og sum úrslit
• við háttaløgum og hugtøkum í lærugreinini at leggja fram, bæði visuelt og munnligt, og grunda um eina framleiðslugongd og sniðgávuloysnir
• at meta um egna og annara sniðgeving við støði í kanningum og greining við sjálvvaldum fokus/tema/sjónarhorni
• at grunda um og leggja fram kropsligar royndir við sniðgeving og byggilist
• við støði í royndum við framleiðslugongdum og sum interessentur at fyrihalda seg grundandi og kritiskt til sniðgivna umheimin
• kritiskt at seta egnar og annara framleiðslugongdir og sniðgávuloysnir í sniðgávusøguligt og tøknisøguligt høpi og í nútíðar- og framtíðarhøpi
• at síggja samanhangir millum ymsar partar av fakliga økinum
• at viðgera greiðsluevni í samspæli við aðrar lærugreinar
• at vísa kunnleika um samleika og háttaløg í lærugreinini.

Í eini framleiðslugongd er málið, at næmingurin dugir:

• at eyðmerkja eitt sniðgávugreiðsluevni og orða, ráðleggja og fremja eina sniðgávuverkætlan, sum er grundað á eitt konsept
• við ymsum strategium at menna hugskot og konsept
• at kanna eitt sniðgávugreiðsluevni við ymsum parametrum og háttaløgum, sum eru nevnd í kjarnaøkjunum
• at sameina hugskotsmenning, konseptmenning og ymsar kanningar í eini ítøkiligari sniðgávuverkætlan
• í eini framleiðslugongd at taka støðu og grundgeva og skjalfesta valini
• at nágreina eina sniðgávuverkætlan ella ein týðandi part av eini sniðgávuverkætlan
• at arbeiða endurtakandi
• at leggja eina sniðgávuverkætlan fram, bæði visuelt og munnliga
• tilvitað at ferðast millum tað verkliga og ástøði, tað úrtøkiliga og tað ítøkiliga, millum heild og smálutir og millum tað kenda og tað ókenda
• at greiða frá endamálinum við og at nýta ymsar visualiseringshættir á ymsu stigunum í framleiðslugongdini.