Náttúrufrøðin er ment við vísindaligum arbeiði og er partur av okkara lívi, lívsumstøðum og mentan og er úrslit av menniskjanna forvitni og tørvi á at skilja náttúrufyribrigdi, ringrásir og samspælið millum livandi verur og umhvørvið og at finna sannleikan um sín egna uppruna og sína tilveru í náttúruni og í alheiminum.

Lærugreinin náttúra og tøkni snýr seg um náttúruna sum heild, skipan, lívið í náttúruni, samanhangir og ta ávirkan, sum menniskju hava á náttúruna, bæði á lívrunna og ólívrunna partin. Undirvísingin er grundað á vísindaligar arbeiðshættir, so sum eygleiðingar, kanningar, greiningar, at innsavna dátur og at gera egnar royndir. Næmingarnir skulu við áhuga, forvitni, undran og upplivingum og við náttúruvísindaligum sjónarhorni ogna sær kunnleika um samspæl menniskjanna við náttúruna, alheimin og við ávirkanina, sum tøkniliga framgongdin hevur á menniskju og náttúru. Næmingarnir skulu í lærugreinini menna sín áhuga fyri náttúruvísindum og tøkni sum grundarlag fyri víðari arbeiði í lívfrøði, alis- og evnafrøði og landafrøði.

Náttúra og tøkni byggir víðari á kunnleika og fimi, sum næmingarnir hava ognað sær í lærugreinini heimstaðarlæru trý tey fyrstu skúlaárini. Innihaldið í náttúru og tøkni skal leggja grundstøði undir hugtøk, forfatan og  førleikar, ið eru neyðug í náttúruvísindaligu lærugreinunum.

Undirvísingin í náttúru og tøkni skal byggja á egnar upplivingar, royndir, eygleiðingar og kanningar, har næmingarnir menna náttúrvísindaligar arbeiðshættir, verkligar førleikar og síni skapanar- og samstarvsevni. Verkliga og granskandi undirvísingin skal tryggja, at næmingarnir gjøgnum upplivingar kunnu nýta sítt forvitni og undran og áhaldandi menna síni evni og áhuga at granska og skapa. Næmingarnir skulu í undirvísingini menna sítt innlit í náttúruviðurskifti og kveikja sín áhuga fyri burðardyggari menning og nýhugsan.

Undirvísingin í náttúru og tøkni hevur til endamáls, at næmingarnir:

• duga at seta spurningar og orða hugsanir um náttúrufrøðilig fyribrigdi og hugtøk
• duga at seta orð á og eyðmerkja variablar (broytilig viðurskifti) og savna inn upplýsingar til tess at finna svar
• kenna mun á eygleiðingum og úrslitum og duga at skipa dátur
• duga neyvt at eygleiða ymisk náttúrulig fyribrigdi og flokka og lýsa hesi eftir eginleikum, funktiónum og tilfari
• duga at nýta egnar kanningar og seta hesar í viðkomandi náttúruvísindaligt høpi.

Lærugreinin náttúra og tøkni hevur fimm ymisk kjarnaøki. Økini umskarast og virka fyri ein stóran part saman í undirvísingini.

• Náttúruvísindaligur arbeiðs- og hugsanarháttur
• Orka og tilfar
• Jørðin og lívið á jørðini
• Kroppur og heilsa
• Tøkni

Náttúruvísindaligur arbeiðs- og hugsanarháttur

Kjarnaøkið náttúruvísindaligur arbeiðs- og hugsanarháttur snýr seg um at granska, eygleiða, kanna, gera støddfrøðiligar uppsetingar (modellera) úr gerandisdegnum, samskifta og seta í frásjón. Náttúruvísindaligur arbeiðs- og hugsanarháttur skal síggjast aftur í øllum táttum í lærugreinini. Við støði í verkligum arbeiði og royndum skulu næmingarnir gera egin modell, meta um og loysa fakligar trupulleikar og soleiðis menna nýhugsan, skapanargleði og fatan av náttúruvísindaligum ástøði.

Orka og tilfar

Kjarnaøkið orka og tilfar snýr seg um at skilja, hvussu vit nýta týðandi ástøði, lógir, modell og hugtøk um orku, evni og bitlar (partiklar) til tess at greiða frá okkara heimi. Við at nýta kunnleika um orku og evnistilfar skulu næmingarnir skilja náttúrufyribrigdi og síggja ymisk høpi í náttúrulærugreinum.

Jørðin og lívið á jørðini

Kjarnaøkið jørðin og lívið á jørðini snýr seg um at menna sína fatan av náttúru og umhvørvi. Næmingarnir skulu fáa grundleggjandi fatan av, hvussu jørðin er skapað, og hvussu lívið á jørðini hevur ment seg. Kunnleiki um jørðina sum skipan, og hvussu menniskju ávirka skipanina, skal geva næmingunum grundarlag at taka burðardyggar avgerðir. Næmingarnir skulu ogna sær kunnleika og vitan um jørðina, og hvussu hon er samansett landafrøðiliga, herímillum kunnleika um lond, heimspartar, heimshøv og ættir. Næmingarnir eiga eisini at ogna sær kunnleika um vøkstur og djóralív.

Kroppur og heilsa

Kjarnaøkið kroppur og heilsa snýr seg um at skilja, hvussu tær stóru og smáu skipanirnar í kroppinum samvirka. Næmingarnir skulu læra at skilja, hvussu kroppurin mennist, og hvussu likamlig og sálarlig heilsa kunnu varðveitast. Kunnleiki um skipanirnar í kroppinum, og hvussu tær ávirka hvørja aðra, skal hjálpa næmingunum til at fara væl um kropp og heilsu alt lívið.

Tøkni

Kjarnaøkið tøkni snýr seg um at brúka og skilja tøknilig amboð og háttaløg, sum eru viðkomandi í náttúruvísindaligum arbeiði. Næmingarnir skulu verða førir fyri at meta um, í hvønn mun tøknin kann hjálpa við at finna loysnir, og hvussu tøknin kann føra til nýggjar avbjóðingar. At nýta tøkni fevnir eisini um at forrita og gera talgild modell og at meta um, hvussu hesi kunnu nýtast í náttúruvísindaligum høpi.